Дзякуючы пілотнаму праекту ў некаторых беларускіх школах удалося значна знізіць колькасць адходаў, а больш за 1700 установаў адукацыі ўжо гатовыя перавесці свае сталоўкі на новы рэжым. Пра гэта паведаміў віцэ-прэм'ер Ігар Петрышэнка, перадае расійскае інфармагенцтва Sputnik Беларусь.
Намеснік прэм’ер-міністра пабываў у пачатковай школе № 29 Мінска, якая ў красавіку гэтага года далучылася да эксперыменту па харчаванні і дзе цяпер вучняў кормяць па-новаму.
У прыватнасці, дзеці цяпер могуць выбіраць упадабаную страву з некалькіх прапановаў, а час прыёму ежы з моманту прыходу ў школу павялічаны да трох гадзін, каб вучні паспелі прагаладацца.
З’ядаюць амаль усё
Петрышэнка звярнуў увагу, што ў сувязі з увядзеннем у пілотных школах новага меню адходы прадуктаў знізіліся да рэкордных 18%. Колькі ежы ішло ў сметніцу раней, ён не ўдакладніў.
— І мы павінныя максімальна старацца, каб гэты паказчык быў яшчэ ніжэйшы. Нуля, вядома, не будзе, але мінімум да 10% трэба імкнуцца. Гэта велізарнае дасягненне, яно паказвае, што кухары працуюць якасна, — адзначыў віцэ-прэм'ер падчас інспекцыі.
Праблемы застаюцца
Паводле чыноўніка, падчас пілотнага праекта па харчаванні, у якім удзельнічае больш за два дзясяткі школ па ўсёй краіне, ужо ўдалося ўкараніць 12−16 эксперыментальных страваў у іншых агульнаадукацыйных установах.
— Гэта 1700 школ з 2690. То-бок усе гэтыя школы гатовыя перайсці [на новае харчаванне] да 1 верасня. Астатнія могуць быць пераведзеныя па ступені гатоўнасці, — растлумачыў Петрышэнка.
Некаторыя школы пакуль не здольныя перайсці на новы рэжым харчавання праз малую колькасць пасадачных месцаў у сталоўках, адсутнасць сучаснага абсталявання на кухні і недахоп кваліфікаванага персаналу. Аднак усе гэтыя пытанні вырашальныя, дадаў ён.
З чаго ўсё пачалося
Нагадаем, у пачатку лістапада мінулага года ва ўрадзе заклапаціліся школьным харчаваннем у школах. Так, прэм’ер-міністр Раман Галоўчанка адзначаў, што да якасці і арганізацыі школьнага харчавання ёсць шмат пытанняў — шмат ежы адпраўляецца ў смецце.
«Навучэнцам нярэдка прапануюцца загадзя нясмачныя, аднастайныя, неэстэтычна аформленыя стравы. Дзеці іх проста не ядуць. Адсюль і вялікая колькасць адходаў пасля школьных сняданкаў і абедаў. А харчаванне даецца 1,1 млн дзяцей», — скардзіўся тады прэм’ер.
Яму тураваў міністр адукацыі Андрэй Іванец: «Харчаванне мусіць адпавядаць не толькі строгім медыцынскім паказанням, але і сучасным смакавым упадабанням дзяцей».
Са снежня мінулага года ў 21 школе і гімназіі Беларусі праводзіцца эксперымент па школьным харчаванні. Мэта праекта — вывучыць смакавыя ўпадабанні школьнікаў і аптымізаваць арганізацыю харчавання. Час прыёму ежы ссунулі, а меню змянілі — такім чынам Мінадукацыі хоча, каб і дзеці елі з апетытам, і адходаў было менш, а сродкі бюджэту і бацькоў траціліся рацыянальней.
Потым праект працягнулі да канца вясны, а ў спіс удзельнікаў дадалі яшчэ дзве пачатковыя школы ў Мінску.
Чытайце таксама
