У чацвер у Беларусі выпала вельмі шмат снегу, і гэта было не толькі прыгожа, але і клопатна для камунальных службаў. Ратавальнікам давялося вызваляць легкавікі, якія захраслі ў заносах, і буксіраваць аўтобусы, а энергетыкам — вяртаць электрычнасць у амаль тры сотні населеных пунктаў, якія «адключыла» непагадзь. А ў пятніцу ўсё можа паўтарыцца — у МНС папярэдзілі пра вецер, ападкі і галалёд.
Напярэдадні беларускім ратавальнікам давялося папрацаваць. У Мінскай вобласці яны выязджалі ў Чэрвенскі, Вілейскі і Барысаўскі раёны: там у снежны палон на трасах трапілі пасажырскі аўтобус, грузавая фура і легкавое аўто — транспартныя сродкі буксіравалі аўтамабілямі МНС.
У Віцебскай вобласці з заносу дасталі машыну хуткай дапамогі, а ў Магілёўскай — яшчэ адзін аўтобус.
Нялёгка было і ў Брэсцкай вобласці: у Ганцавічах ратавальнікі выцягнулі з кювета легкавік, у Брэсце — знялі з шостага паверха жылога дома кавалак агароджы балкона, які пагражаў абрынуцца. У вёсцы Свішчава Камянецкага раёна і ў Баранавічах прыбралі два дрэвы, якія зваліліся на праезную частку і перагарадзілі дарогу.
Усяго ж у розных раёнах Беларусі на дарогі трапіла шэсць дрэваў, якія спатрэбілася прыбраць.
Добрая навіна — у выніку гэтых здарэнняў ніхто не пацярпеў.
У Мінэнерга расказалі, што моцны вецер і наліплы на правады снег пакінулі без электрычнасці 285 населеных пунктаў, у асноўным у Мінскай і Гомельскай абласцях.
У большасць вёсак і аграгарадкоў святло ўжо вярнулі, але дзе-нідзе раніцай 24 лістапада працы яшчэ працягваюцца.
Расслабляцца рана: аранжавы ўзровень небяспекі выпісаны і на пятніцу. 24 лістапада сіноптыкі зноў прагназуюць дождж, снег і мокры снег, галалёд, на асобных участках дарог — галалёдзіцу. Тэмпература паветра днём 0…+5°C, пазней будзе халадаць.
У МНС папярэдзілі, што на большай частцы Беларусі чакаецца ўзмацненне заходняга ветру парывамі да 15−20 м/с. Вецер такой сілы абрывае правады, валіць дрэвы і рэкламныя канструкцыі, зрывае дахі.
Рэкамендацыі МНС падчас моцнага ветру:
- прыбярыце гаспадарчыя рэчы з двара і балконаў у дом (падвал), абрэжце сухія дрэвы, якія могуць нанесці шкоду вашаму жытлу;
- машыну пастаўце ў гараж, пры адсутнасці гаража яе варта паркаваць удалечыні ад дрэваў, а таксама слаба ўмацаваных канструкцый;
- знаходзячыся на дварэ, абыходзьце хісткія будынкі і дамы з няўстойлівым дахам;
- унікайце дрэваў і разнастайных збудаванняў павышанай рызыкі (мастоў, эстакад, трубаправодаў, ліній электраперадачы, патэнцыйна небяспечных прамысловых аб’ектаў).