Прэс-сакратарка Аляксандра Лукашэнкі Наталля Эйсмант адзначыла «бурную рэакцыю» на «Баладу пра дыктатара», якую прысвяцілі Аляксандру Лукашэнку і выканалі на праўладным форуме, пра гэта яна расказала ў эфіры новага «Першага інфармацыйнага тэлеканала». Паводле яе, сярод іншых каментароў быў такі, што беларуская прапаганда скрала ў апазіцыі «пудзіла дыктатуры».
Наталлю Эйсмант спыталі, ці адсочвае яна рэакцыю на прэм’еру кампазіцыі.
«Вы ведаеце, ну я б не выкарыстоўвала фармулёўку „адсочваем“. Ну, глядзім, вядома. Калі пра рэакцыю казаць, то ўжо цяпер бачым, што яна бурная. Глядзім каментары»,-сказала прэс-сакратарка.
Яна прывяла прыклад упадабанага каментара.
«Адзін з найбольш яркіх, на маю думку, быў пра тое, што нібыта мы скралі ў апазіцыі „пудзіла дыктатуры“. Ну што на гэта можна сказаць? Скралі дык скралі, трэба лепш хаваць», — сказала Эйсмант.
Пра рэакцыю Лукашэнкі на прысвечаную яму песню ў апублікаваным інтэрв'ю не гаварылася.
Дарэчы, менавіта Наталля Эйсмант яшчэ пяць гадоў таму праславілася фразай «Дыктатура — гэта наш брэнд»: так яна ў інтэрв'ю на АНТ апісала імідж Аляксандра Лукашэнкі.
— Сёння, у 2019 годзе, слова «дыктатура» ўжо часам — не ведаю, пагодзіцеся вы са мной ці не, — набывае нейкае пазітыўнае адценне. Мы бачым, што адбываецца навокал. Мы бачым хаос, часам беспарадак. І ведаеце, я, можа, цяпер нейкую парадаксальную рэч скажу ці нечаканую, але часам мне здаецца, не сёння дык заўтра ў свеце можа ўзнікнуць запыт на дыктатуру. Бо за дыктатурай у нашым сённяшнім разуменні мы бачым у першую чаргу парадак, дысцыпліну і абсалютна нармальнае, спакойнае жыццё, — каментавала яна.
— Мне здаецца, ужо мы так часта вымаўляем гэтае слова, што дыктатура — гэта ўжо наш брэнд, — дадала Эйсмант.
Нагадаем, 17 верасня на канцэрце да Дня народнага адзінства (там, дзе Мікалай Лукашэнка граў на раялі) у Мінску для Аляксандра Лукашэнкі праспявалі «Баладу пра дыктатара». Прадстаўляла яе прэс-сакратарка палітыка Наталля Эйсмант. Песні, з яе словаў, ужо «крыху больш за год». Праўда, арыгінальны тэкст аўтара і выніковы прадукт адрозніваюцца.
Напрыклад, у арыгінале аўтара, малдаўскага тамады Паўла Дуганава, былі словы «сильна у батьки натура, и понять, бл**ь, узколобым пора — да, в Беларуси есть диктатура, диктатура справедливости и добра». У канцы Дуганаў зычыў: «Александр Григорьевич, многая лета».
У канцэртным варыянце «бл**ь, узколобым» замянілі на «давно всем», а зварот да Лукашэнкі ператварыўся ў «всем беларусам».