У сеціве з’явіліся паведамленні пра тое, што ў Беларусі перастала працаваць абсталяванне кітайскай кампаніі Xiaomi.
«У MiHome леглі серверы, я пералапаціў увесь інтэрнэт і даведаўся ў знаёмых з Расіі і Беларусі, што так ва ўсіх», — напісаў у рэдакцыю «Люстэрка» чытач.
Першыя паведамленні пра тое, што пачалі назірацца збоі ў працы тэхнікі Xiaomi, з’явіліся ўвечары 4 кастрычніка. Карыстальнікі пісалі, што ў Беларусі і Расіі ў іх перасталі працаваць пыласосы, камеры відэаназірання, разеткі, лямпачкі.
«Не адкрываюцца праграмы (Xiaomi Community, Mi Store, GetApps), не сінхранізуецца Xiaomi Cloud, не адпраўляюцца справаздачы пра памылку», — паведаміў адзін з карыстальнікаў.
Іншы дадаў, што ні робат-пыласос, ні ачышчальнік, ні ўвільгатняльнік, ні камера дыстанцыйна не працуюць. Яшчэ адзін удзельнік гутаркі падсумаваў, што цяпер у яго «дурны дом». А хтосьці наогул не змог разблакаваць тэлефон пасля скіду да завадскіх наладаў.
«Ну ўсё, звычайны пыласос у рукі — і пайшлі па-старому пыласосіць», — падсумаваў карыстальнік igoryok47.
На спецыялізаваным форуме 4PDA карыстальнікі сышліся ў меркаванні, што праблемы ўзніклі з прыладамі, прывязанымі да праграмы з устаноўленым рэгіёнам «Расія».
Паводле тэлеграм-канала Mash, праблема ў збоі на серверах Xiaomi. У расійскім прадстаўніцтве кампаніі гэтую інфармацыю пацвердзілі і паабяцалі аператыўна вырашыць праблему.