Былы палітвязень, блогер Vadimati (Вадзім Ермашук) заключыў шлюб са сваім партнёрам Дзянісам, каб уз’яднацца з ім у Польшчы. Цырымонія прайшла анлайн, а афіцыйным месцам шлюбу стаў амерыканскі штат Юта — адзін з рэгіёнаў у ЗША, дзе распісваюць аднаполыя пары. Нягледзячы на тое што Польшча афіцыйна не прызнае такія шлюбы, гэты крок можа дапамагчы пары ўз'яднацца ў гэтай краіне, піша MOST.
Вадзім расказаў MOST, што цырымонію вяла жанчына-пастар. Роспіс праходзіў паводле часу штата Юта, а ў маладых у гэты час была глыбокая ноч: у Дзяніса ў Вільнюсе — 02.15, у Вадзіма ў Варшаве — 01.15.
«Цяпер мы муж і муж», — кажа Вадзім.
Маладыя людзі разам ужо больш за дзесяць гадоў, але не хаваюць, што распісаліся цяпер, каб вырашыць пытанне з легалізацыяй.
Пасля вызвалення ў 2024 годзе Вадзім выехаў з Беларусі ў Польшчу, дзе папрасіў пра міжнародную абарону. А яго партнёр папрасіў прытулку ў Літве ў 2025 годзе. Праз бюракратычныя абмежаванні, звязаныя з Дублінскім рэгламентам, пара не можа ўз'яднацца: еўрапейскае права патрабуе, каб запыт на прытулак разглядаўся ў першай краіне ўезду ў ЕС. Для Вадзіма і Дзяніса заключэнне шлюбу стала юрыдычным спосабам наблізіць дзень, калі яны зноў змогуць жыць разам.
Польшча не прызнае аднаполых шлюбаў, нават калі яны былі заключаныя за мяжой. Але ў некаторых выпадках, у тым ліку падчас падачы дакументаў на міжнародную абарону, факт сумеснага жыцця і партнёрства можа быць улічаны як сацыяльная і сямейная сувязь. Цяпер у пары ёсць дакумент, які гэта пацвярджае.
— Зараз пайду на [вуліцу] Табарова (там знаходзяцца памежная служба і міграцыйнае ведамства. — Заўв. рэд.) аддаваць гэтыя ўсе дакументы, — расказаў Вадзім. — Вельмі хачу дапамагчы Дзянісу, бо ён тут працаваў і жыў [раней]. Яму будзе тут значна прасцей.
Папулярны блогер Vadimati праседзеў тры гады ў калоніі за абразу Лукашэнкі і здзек з дзяржаўных сімвалаў. Тэрмін ён адбываў у так званым нізкім статусе — для гэтага сілавікі спецыяльна распаўсюджвалі інфармацыю пра яго сэксуальным кантакце з мужчынам. Вызваліўшыся, Вадзім перанёс аперацыю па выдаленні злаякаснай пухліны і здолеў пераехаць у Польшчу. Цяпер ён чакае рашэння па міжнароднай абароне ў гэтай краіне.