Сусветная эндакрыналагічная супольнасць апублікавала новыя рэкамендацыі па прыёме вітаміна D для прафілактыкі захворванняў. Яны адрозніваюцца ад тых, што былі прынятыя ў 2011 годзе, паведамляецца на сайце арганізацыі The Endocrine Society.
Згодна з новымі рэкамендацыямі, рэгулярныя тэсты на ўзровень гэтага вітаміну ў арганізме не патрэбныя. Калі ў пацыента няма відавочных сімптомаў дэфіцыту вітаміну D, такіх як дэпрэсія ці высокі крывяны ціск, то няма і неабходнасці рэгулярна правяраць яго на дэфіцыт гэтага рэчыва.
Таксама эндакрынолагі заявілі, што прымаць дабаўкі з вітамінам D трэба далёка не ўсім. Напрыклад, здаровым людзям ва ўзросце да 75 гадоў яны наогул не патрэбныя, бо ўзровень гэтага вітаміна папаўняецца за кошт ежы і сонца.
Акрамя таго, у новых рэкамендацыях дактарам раяць прызначаць пацыентам дабаўкі вітаміна D пры яго ўзроўні 12 нг/мл, бо такі паказчык кажа пра сур’ёзны недахоп гэтага рэчыва ў арганізме. Калі ўзровень 30 і вышэй, то гэта значыць, што вітаміну D у крыві дастаткова, і прымаць яго для прафілактыкі і папаўнення не трэба.
Паводле правілаў 2011 года, дактары прызначалі пацыентам прыём гэтага вітаміну ўжо пры ўзроўні 30 нг/мл, але праз 13 гадоў яны прызналі, што тыя рэкамендацыі былі распрацаваныя на падставе мінімальных звестак пра гэтае рэчыва, да таго ж тады не было дастатковай колькасці даследаванняў на гэтую тэму.
У новых рэкамендацыях па прыёме вітаміну D дактары раяць прымаць дабаўкі з вітамінам D у нізкіх канцэнтрацыях толькі некалькім групам людзей. Такія дабаўкі патрэбныя дзецям да 18 гадоў для прафілактыкі рахіту, людзям, старэйшым за 75 гадоў, для зніжэння рызыкі смяротнасці, а таксама цяжарным для зніжэння рызыкі развіцця прээклампсіі, унутрычэраўнай смяротнасці, заўчасных родаў і дарослым з высокай рызыкай развіцця пераддыябету.